EH Bilduk mozio bat aurkeztu du Espainiako Senatuan, Angel Salas Larrazabali kondekorazio guztiak kentzeko eskatuz, Otxandioko (Bizkaia) bonbardaketaren 88. urteurrenaren harira. Espainiako militar frankistek 61 pertsona erail zituzten, eta herria suntsitu zuten hegazkinez egindako bonbardaketan. Eskuindarren estatu kolpea hasi eta handik lau egunera gertatu zen.
Gorka Elejabarrieta EH Bilduren Senatuko bozeramaileak «berehalako neurriak» hartzeko eskatu dio Espainiako Gobernuari. Espainiako Memoria Demokratikoaren Legeak krimen faxistekin lotutako ohoratzeak indargabetzeko agintzen du, eta Angel Victor Torres Memoria Demokratiko ministroak arrazoia eman zion EH Bilduri gai horren harira, apirilaren 2an.
Salas Otxandioko sarraskiaren arduradun nagusietako bat izan zen, eta Francoren diktadura garaian senataria izan zen. 1991n Felipe Gonzalezen gobernuak Aireko Armadako jeneralaren ohorezko izendapenarekin saritu zuen, «aparteko merituak» egiteagatik.