Asteburuan izandako eraso matxista gaitzesteko, elkarretaratzera deitu du gaurko Xulufrinak talde feministak Lesakan (Nafarroa). Herri horretako udalak bat egin du deialdiarekin, eta ohar baten bitartez ziurtatu du «emakumeen aurkako eraso guztiak» gaitzetsiko dituela. Babesa helarazi dio biktimari, eta biztanleei gogorarazi die eraso matxistak «onartezinak» direla. 19:00etan izango da elkarretaratzea, Plaza Zaharrean.
Lesakako Udalak zabaldutako oharrean azpimarratu duenez, gainera, oso garrantzitsua da berdintasunean oinarritutako gizarte bat eraikitzeko saiakerei eustea. Alde horretatik, erakunde publikoen ardura nabarmendu du.
Foruzaingoak gizonezko bat atxilotu zuen asteburuan bertan, erasotzailea delakoan; biktimaren bikotekide ohia da. Poliziak berak eraman behar izan zuen biktima ospitalera, buruan hartutako kolpe baten ondorioz.