Falkland uharteak, Malvinak

Hizkuntzak: ingeles.
Biztanleak: 3.000 lagun (2006). Biztanleen %70 britainiarrak eta haien ondorengoak dira. Hegoamerikarren gutxiengo txiki bat ere bada (txiletarrak dira gehienak).
Erlijioak: gehienak kristauak dira, hainbat elizatan banatuak (Ingalaterrako Eliza, katolikoak, Eliza libre batua, ebanjelistak, Jehovaren lekukoak, luteranoak, zazpigarren eguneko adbentistak).
Jakingarriak: Atlantikoko hegoaldeko lurralde britainiarra.
 

Faroe uharteak

Hizkuntzak: faroera eta daniera, biak dira ofizial.
Biztanleak: 48.400 lagun (2012). Faroetar, danimarkar.
Erlijioak: luteranoak dira nagusi. Katolikoak, adbentistak, Jehovaren lekukoak eta beste ere badira, baina gutxiengo dira.
Jakingarriak: administrazio ia independentea duen lurralde danimarkarra.
 

Feroe

Jakingarriak: Ikus Faroe uharteak
 

FIJI

Hizkuntzak: ingeles, fijiera, Fijiko hindi (hirurak dira ofizialak). Badira beste gutxiengo batzuen mintzairak ere: tamilera, bengalera, gujaratera, telugu, biharera. Rotuma uhartean bere hizkuntza polinesiarra dute, rotumera.
Biztanleak: 876.000 lagun (NBE, 2012). Fijiar (%54,3), indiar (%38,1), rotumar (%1,2), europar, txinatar.
Erlijioak: kristau (%58), hindu (%33,7), musulman (%7), sikh (%0,4), sinesgabe (%0,7), beste (% 0,2).
 

FILIPINAK

Hizkuntzak: 170 hizkuntza baino gehiago daude Filipinetan. Ingeles (ofiziala), tagalo (ofiziala, %20 inguru; ofizialki filipinera esaten zaio). Bertako beste hamaika hizkuntzak dute milioi bat hiztun baino gehiago: cebuanoera (18,5 m.), ilocanoera (7,7 m.), hiligaynonera edo ilonggoera (%6,9 m.), bikolera (3,7 m.), waray-waray (3,1 m.), kapampanganera, pangasinenseera, kinaray-a, maranaoera, maguindanaoera eta tausug. Gutxiengoen zenbait mintzaira: arabiera, txinera, sindhi, punjabera, japoniera, malaysiera.
Biztanleak: 96,5 milioi (NBE, 2012). Filipinar (%74,7; tagalo %28,1, cebuano %13,1, ilocano %9, bisaya %7,6 (binisaya*), hiligaynon edo ilonggo %7,5, bikol %6, waray %3,4), beste (%25,3; txinatar, amerikar, Asia hegoaldeko, espainiar, europar, arabiar, indonesiar, korear, japoniar...).
Erlijioak: katoliko (%80,9), musulman (%5), ebanjeliko (%2,8), Iglesia ni Cristo (%2,3), aglipayan (%2, Filipinetako Eliza independenteko kideak), bestelako kristau (%4,5), beste (%1,8), zehaztugabe (%0,6), sinesgabe (%0,1).
 

FINLANDIA, SUOMI

Hizkuntzak: finlandiera / suomiera (ofiziala, %92), suediera (ofiziala, %5,6), beste (%2,4; errusiera, estoniera eta samiera edo laponiera). Samiera ofiziala da zenbait udalerritan, eta administrazioarekiko harremanetan erabiltzeko eskubidea dute; 2.500 lagun inguruk hitz egiten dute.
Biztanleak: 5,4 milioi (NBE, 2012). Finlandiar (%93,4), suediar (%5,7), errusiar (%0,4), estoniar (%0,2) ijito (%0,2), sami edo laponiar (%0,1, baina gutxik gorde dute euren hizkuntza).
Erlijioak: luterano (%84,2), ortodoxo (%1,1), bestelako kristau (%1,1), beste (%0,1), sinesgabe (%13,5).
 

Flandria

Hizkuntzak: nederlandera (ofiziala), frantses, yiddish, turkiera, arabiera, amazigera, italiera, espainiera, ingeles, aleman.
Biztanleak: 9 milioi flandriar bizi dira munduan barrena. Belgikan 6,1 milioi bizi dira.
Erlijioak: katoliko (%75) eta beste (gehienak sinesgabeak dira; protestante, judu, musulman gutxiengoak ere badira).
Jakingarriak: Flandria esaten dugunean, kulturalki edo soziologikoki, Flandriako herriaz edo nazioaz ari gara; politikoki, berriz, Belgika osatzen duten hiru eskualdeetako bat da. Erdi Aroan, Belgikako, Frantziako eta Herbehereetako lurrak biltzen zituen. Nederlanderaz, Vlaanderen esaten diote.
 

FRANTZIA

Hizkuntzak: frantses (ofiziala), okzitaniera, aleman, italiera, bretoiera, katalan, korsikera, nederlandera, euskara, alsaziera; eta etorkinen artean, arabiera, kabiliera edo amazigera, kreolera, portuges, turkiera, txinera (wuera, kantonera, mandarin txinera), vietnamera, khmerera eta beste.
Biztanleak: 63,5 milioi (NBE, 2012). Frantziar, portuges, aljeriar, marokoar, okzitaniar, alsaziar, bretoi, katalan, euskaldun, korsikar eta beste hainbat gutxiengo.
Erlijioak: katoliko (%83-88), musulman (%5-10), protestante (%2), judu (%1), afiliaziorik gabe (%4).
Menpeko herrialdeak: Frantziako administrazioak 18 eskualde edo erregio ditu 2016az geroztik (lehen, 27 zituen). Hamahiru Frantzian bertan daude, eta bost, berriz, itsasoz haraindi. Eskualdeak departamenduz osatuak daude: 96 departamendu metropolikoak dira, eta bost itsasoz bestaldekoak. Kolonia frantsesek estatus bat baino gehiago dute. Batzuk itsasoz haraindiko departamendu eta eskualdea dira (DROM; lehen, DOM-ROM): Guadalupe, Guyana Frantsesa, Martinika, Mayotte eta Reunion. COM izenekorik ere bada (itsasoz haraindiko kolektibitateak): Polinesia Frantsesa, San Bartolome, San Martin, Saint-Pierre eta Mikelune, eta Wallis eta Futuna. Dena dela, Polinesia Frantsesari itsasoz haraindiko herrialdea edo POM deritzo 2004ko estatutuan (pays d'outre-mer). Itsasoz haraindiko lurralde bat ere bada (frantsesez, territoire d'outre-mer, TOM): Frantziaren Lurralde Austral eta Antartikoak. Kolonia bakoitzaren datuak jakiteko, ikus banan-banan. Horiez gain, zenbait uharte Frantziaren menpe daude: Bassas da India, Clipperton uhartea, Europa uhartea.
Transkripzioak: toponimoak idazteko, ikus taulak. Ikus, halaber, Bretainia, Euskal Herria, Herrialde Katalanak, Korsika eta Okzitania.
 

Frisia

Hizkuntzak: nederlandera, frisiera (360.000-700.000 hiztun artean). Biak dira ofizialak.
Biztanleak: 642.998 lagun.
Erlijioak: protestante (%39), katoliko (%8) eta beste.
Jakingarriak: Frisia kostaldean dago, Ipar itsasoan. Frisieraren lurraldea da, eta Herbehereetako ipar-ekialdea eta Alemania iparreko eta Danimarkako eskualde txiki batzuk hartzen ditu. Ongi bereizi behar dira Frisia eskualde historikoa, batetik, eta Frisiak Herbehereetan duen zatia (Frisia probintzia), bestetik. Frisieraz, 'Fryslan' deritzo; nederlanderaz, 'Friesland'.
Transkripzioak: frisierazko toponimoak guztiz arrotzak zaizkigunez, alemanez edo nederlanderaz idatzita emango ditugu. Dena dela, mugimendu abertzaleari edo hizkuntzari buruz idaztean, frisierazko era jarriko dugu parentesi artean.
 

Friuli

Hizkuntzak: italiera (ofiziala), friulera (furlan du berezko izena), venetoera, esloveniera, alemana. 1999an hizkuntza gutxituak babesteko legea onartu zutenetik, friulera ere ofiziala da. Gaur egun 600.000 hiztun ditu.
Biztanleak: milioi bat. Italiar, esloveniar, aleman.
Jakingarriak: Italiako ipar-ekialdeko eskualdea da. Ez da nahastu behar Friuli-Venezia-Julia eskualde autonomoarekin. Friuli historikoa Udine, Pordenone eta Gorizia probintziek eta beste zenbait udalerrik osatzen dute (egun, Friuli-Venezia-Julia eta Veneto eskualdeen artean banatuta daude Friuli historikoa osatzen duten lurraldeak). Jatorriz Friul da eskualdearen izena.
Transkripzioak: friulerazko toponimoak guztiz arrotzak zaizkigunez, italierazkoak hobetsiko ditugu. Dena dela, bertako abertzaleei edo hizkuntzari buruz idaztean, friulerazko izena ere idatziko dugu parentesi artean.