Langile publikoen soldata %2 igotzea proposatu die Jaurlaritzak sindikatuei

Arabako, Bizkaiko eta Gipuzkoako administrazio publikoan ari diren 70.000 langile publikoen «lan baldintzak hobetzeko» proposamena egin die sindikatuei Eusko Jaurlaritzak: 2020. urterako soldatak %2 igotzea. Gasteizko gobernuak esan duenez, Itzarri BGAEari egiten dion ekarpena ere hobetuko litzateke, %1,5era urtea amaitu aurretik, eta %2ra 2020an. «Proposamen eskuzabala da; are gehiago kontuan hartuta inguratzen gaituen errealitatea», esan zuen Andres Zearreta Funtzio Publikoko sailburuordeak, atzo.

ELA, LAB, CCOO eta UGT sindikatuek, ordea, erabateko desadostasuna helarazi zioten gobernuari Funtzio Publikoko Mahai Orokorraren bileran. Hasteko, ez dagoelako behin-behineko enplegua kontsolidatzeko proposamenik. «Europako sektore publikoko behin-behinekotasun tasa handiena edukita ere, Jaurlaritzak jokabide arduragabea izan du», esan zuen ELAk. Jarrera horren atzean «behin-behinekotasun tasari eusteko gobernuaren erabakia dago», sindikatuaren ustez. %35etik gorakoa da tasa hori gaur egun. Euskal sektore publikoan «pribatizazioa aurrera eramateko helburua» dagoela uste du ELAk.

LABek ere arazo berari erreparatu zion. «Kontratazioa egonkortzeko lege propioa behar dugu, eta Jaurlaritza txapuzatan ari da gaiari arduraz heldu beharrean». Sindikatu abertzaleak, era berean, mahairatu zuen «erosteko ahalmena berreskuratzeko plan bat» behar dela, 2020rako %2ko igoerak ez baitu orekatzen azken hamarkadan langile publikoek galdutako erosteko ahalmena.

Itzarriren ekarpena

ELAk ikuspuntu bera dauka; «igoera xume horrekin, hamarkada batean metatutako erosteko ahalmenaren galera %13tik gorakoa da», esan zuen. %2ko igoera Gasteizko gobernuak eta Espainiakoak adostutako defizit helburuen, gastu langaren eta zorpetze mugaren barruan dagoela gogoratu zuen, baita Itzarriko ekarpena %3koa zela ere hura eten baino lehen; eta, hortaz, gobernuak murrizketari eutsiko liokeela. 2012an Itzarriko ekarpena jasotzeari utzi zioten langile publikoek, eta iaz hasi ziren berriro jasotzen, baina aurtengo bukaeran jatorrizko ekarpenaren erdia baizik ez lukete lortuko.

Jaurlaritzak Mahai Orokorrean egindako proposamenak Lakuako Administrazio Orokorreko langileei eragiten die, eta erakunde autonomoetakoei ere bai: Ertzaintzakoei, Hezkuntzakoei, Justiziakoei eta Osakidetzakoei. Gainera, erreferentzia nagusia da sektore publikoan aritzen diren langile guztientzat, hau da, 100.000 langilerentzat.