BERRIAn 2015-04-19an ezker abertzalearen bilakaeraz argitaratutako erreportajeko artikulu nagusia. Sarrera: Urte hasieran, Euskal Bidea aurkeztu zuten EH Bilduk eta EH Baik. Justu hogei urte dira ETAk Alternatiba Demokratikoa plazaratu zuela, bi hamarkada lehenagoko KAS Alternatiba eguneratzeko asmoz. Bada bilakaera bat. Eskaintza nagusiak 

Osagaiak: Analisia / Aznarren aurkako atentatua / Jose Felix Azurmendiren iritzia / Imanol Murua Uriaren iritzia.

BERRIAko erreportajeko lehen lau orrialdeen irudiak.

Gurutze Izagirre Berria-ko kazetariak hau idatzi du gaurkoan: “Ertzaintzak erabilitako gomazko pilotak galarazteko eztabaidan onartu den behin betiko ebazpen ofizialak ez du gauza bera esaten euskaraz eta gaztelaniaz. Euskarazko ebazpenak dio gomazko pilotak berehala ‘kentzeko’ [‘ken ditzala’] eskatzen diola Eusko Legebiltzarrak Segurtasun Sailari. Gaztelaniazkoan berehala murrizteko — ‘restricción’ — eskatzen dio”. Hala agertzen zen legebiltzarraren dokumentuan (ikus beheko lehen irudia). Ba dokumentu berean aldaketa bat dator, orain euskarazkoan “murriztu” jartzen baitu (ikus beheko bigarren irudia). EH Bilduren eskaerak gomazko pilotak “galarazteko” eskatzen zuen.

Joan Mari Torrealdaik Baionan larunbatean egindako tortura aitortzatik, honek hotzikara sortzen du: “2003ko otsailaren 20ko gaueko ordu bat eta erdietan orroka sartu ziren etxean. Espantuaren espantuz ohetik jaiki nahian lurrera erori nintzen. Ez dakit zenbat ziren. Asko. Guardia zibilak ziren, nahiz eta gehienak paisanoz jantzi. Emaztea eta bi haurrak egongelan apartatu zituzten. Ni inkomunikatuta nengoen, eta mugitu ezinda nindukaten. Bukatu zutenean, emaztea eta haurrak agurtzea eskatu nuen. Ozta-ozta agurtu ahal izan nituen. Guztiz blokeatua nengoen, eta haiek ez gutxiago. Honela gertatu zen: unetxo batez besarkatu ahal izan nuen familia. Segidan eskuak lotu eta gaizkile gisa gau ilun eta hotzean atera ninduten etxetik. Ataria gurutzatu berritan, agente batek zera bota zidan: ‘Zein hotz agurtu dituzun haurrak!’. Eta kotxe polizialean sartzeko gaudela, beste hau: ‘Aitaren zein irudi izango dute orain haurrek?'”. Torrealdairen ‘Egunkaria kasua: torturaren markak’ testigantza, osorik. ♦

Sorian Laguna Negra urmaelera iristeko metro batzuk falta direla argazkiko aterpe txiki hau dago. Pazko astean, Alcalako gizon-emakume edadetu batzuk eseri dira bertan, argazkia ateratzeko, eta erretratistak esan die goian Gora Euskal Herria jartzen duela (Otegi askatu ere ageri da, haren azpian). Haietako pare batek klikaren orduan patata esan beharrean, Pamplona esan dute. ‘Pamplona’, Euskal Herria espainiar haientzat, natural-natural.

Negociador filman Suitzan halako batean ‘Jesus Egiguren’ eta ‘Josu Urrutikoetxea’ negoziatzen ari direla, iristen da igandea eta ezin segitu, itzultzaileak uko egiten diolako igandez lan egiteari. Bitartekariarekin trago bat behintzat hartu ondoren, ‘Egiguren’ eta ‘Urrutikoetxea’ aurrenaren gelara igotzen dira, eta ETB1 ikusteari ekiten diote. Pelikulan telebistako irudirik ez da ageri, baina esatariari entzuten zaio eta Barakaldo-Reala B futbol partida ari da; esatariak Realeko Callens, Hervias edo Oiartzun jokalariak aipatzen ditu. 2005-2006ko negoziazio garaiak dira filmako haiek, eta Callensek eta hauek orduan 12-13 urteko mutil koskorrak ziren. Gaztetxo Sansen jokatzeko.

Continue reading

(‘Lerro batzuk’ bloga, martxan) Negociador filmako lehen sekuentzian ‘Jesus Egiguren’ taberna batean ageri da, xerra patatekin jaten. Ostatura hiru lagun sartzen dira, eta begirazuna egiten diote. ETAkoekin Suitzan negoziatzen jardun ondoren, berriro taberna hartan da ‘Egiguren’, eta pelikulako azken sekuentzia aurrenekoaren berdina da, baina hiru lagun haiek kasu egiten diote. Etzi lau urte prozesua “oso ondo” zihoala zioen Egigurenek Euskadi Irratian, argudio hau emanez: “Azpeitiko Institutuan ibili nintzen ni, eta han ibili ginenok azkeneko 30 urtean elkarri ez diogu kasurik egin. Baina orain ohartu naiz egun batetik bestera elkar agurtzen hasi garela. Aldaketa soziologikoa egon da, mundua aldatzen ari da”.
Continue reading