Lerro batzuk

Enekoitz Esnaola

Page 22 of 47

Gauza txiki batzuk (5)

2016-11-24 /

Gobernuaren kohesioa. Ikusi egin behar zer-nolako kohesioa lortzen duen Jaurlaritza berriak, bertan bi alderdi izanda. Hasteko, arraro samarra egiten da sail batean Enplegua egotea (EAJ) eta beste batean Lana (PSE-EE).

Jonan Fernandez. EAJ-PSE gobernu itunean Elkarbitza eta Giza eskubideak atalean konpromisoetako lehen puntuan ETAren “indarkeriaren amaiera ordenatua” ageri da. PSEk hauteskunde programan ez zeukan halakorik, EAJk bai. EBBk lortu du esaldi (kontzeptu) hori txertatzea akordioan, eta ematen dio garrantziarik. Jonan Fernandez atzo eta gaur inbestidura saioan izan da.

Otegi. Atzo arratsaldean Joseba Egibar (EAJ) bere lehen hitzaldia –ordu erdikoa– hastera zihoala, harmailetatik alde egin zuen Arnaldo Otegik. Bukatu zuen Egibarrek, eta Otegi orduantxe sartu zen berriro. Zergatia? Financial Times-ekin elkarrizketa egitera atera zen Otegi. Le Monde-rekin ere egin zuen atzo.

Senper. “Abstentzioa”, esan du Borja Senperrek bozketan. “Abstención“, PPko beste kideek –Laura Garridok nola esan duen ez dut entzun–. Duela urtebete Senperrek BERRIAko kazetari bati esan zion euskara ikasten ari zela, eta ea hurrena euskaraz egiten zuten elkarrizketa. Etxean egin dezake mintza praktikarik. 

EH Bildu. Maddalen Iriartek inbestidurako bere hitzaldian %85 inguru euskaraz egin zuen. EH Bilduk diskurtsoaren kopia banatu zien kazetariei, eta lehen orrian goian ageri da, koalizioaren ikurraren ondoan: Bai Euskarari. Zerbitzua euskaraz. Egibarrek ere ia dena euskaraz egin zuen.♦

Luzerako doa

2016-11-23 /

BERRIAko analisiaren (2016-11-23) laburpena: Ez da harritzekoa izan EAJk eta PSE-EEk gobernu ituna egitea. Beste itun bat izan da, baina EAEn zirkulua itxi duena da. Duela hiru urte abisatu zuten zer egitekoak ziren, ez atzo gauean, eta ezker subiranista soziopolitikoa ez da gai izan alternatiba bat prestatzeko. Pultsu soziala ondoen hartzen duen alderdia da EAJ, eta gizartearen antzik handiena duena. Gainera, gobernatzeko babesak behar baditu, erraz jartzen ditu besteak bere bueltan. EAEn EAJrena da zentralitate politikoa, eta luzerako doa PSErekin duen aliantza. Gertakari handiak beharko lirateke taula astintzeko edo. Kataluniaren aldebakartasuna, muturreraino? ETArena? Aurreko legealdian Jaurlaritzaren ardatz batzuetan aurrerabiderako estrategia ausart baten falta zen gauzarik nabarmenena. Gobernu itun hau aztertuta, badirudi bide berean abiatu dela EAJ. Eroso. Gainera, nekez ikusiko da gobernukideen arteko pitzadurarik. Donostia 2016k presoen artelanei ezarritako zentsuran ikusi da: Markel Olano ahaldun nagusiak ere ez du erreparorik izan adierazteko ez dela zentsurarik egon. Izan ere, zergatik ireki arrakala?♦

Andaluziako Brouard auzoa

2016-11-20 /

Gaur zortzi Juan Puerto Morcilloren elkarrizketa aterako dugu BERRIAn. Extremaduran (Espainia) sortu zen, eta 22 urte zituenean Bilbora etorri zen lanera eta bizitzera. Komunista da, 78 urte dauzka, eta egun Alternatiban dabil –alderdiak haren dokumental bat egin berri du–. Elkarrizketan, besteak beste, Santi Brouard ekarri dugu gogora. GALek gaur 32 urte hil zuen Brouard mediku, HASIko kide eta HBko mahaikidea, eta Puertok elkarrizketan oroitu du 1985eko maiatzean nola inauguratu zuten Badolatosan (Sevilla, Espainia) Santiago Brouard medikua auzoa. “Andaluziako iraultzaileek antolatu zuten ekitaldia, Comisiones Obreras del Campokoek. Han izan ziren Jon Idigoras eta Txomin Ziluaga ere, baita Brouarden alarguna eta alaba bat ere. Ondo gogoan dut alargunak [Teresa Aldamizek] egindako hitzaldia; iraultzailea egin zuen, izugarria”. Argazkian, Badolatosako oholtzan ezkerrean ageri dena da Aldamiz –2012an zendu zen–. Duela hamar urte pasatik ‘Ernesto Che Guevara’ izena du auzo horrek.♦

Brouard

Gauza txiki batzuk (4)

2016-11-18 /

Eusko Ikaskuntza. 2018an 100 urte beteko ditu Eusko Ikaskuntzak. Hasiera indartsua izan zuen: Euskaltzaindia abiarazi zuen, ikastolen oinarri teorikoak prestatu zituen, 1931ko Hego Euskal Herriko estatutua idatzi zuen… Frankismoaren ondorioz eta ondoren baju egon da, zahartuta bezala. Duela lau bat urte erakundeari berritu bat emateko asmoz bide bati ekin zion, eta 2018rako anbizio handiko egitasmoa du. Iñaki Dorronsoro lehendakaria hedabideei ere ari da azaltzen proiektua, bilerak eginda; asteon BERRIAn egon da. Aurki hasiko da zertzelada batzuk publikoki azaltzen.

Imanol Murua Uria. Gaur atera dugu BERRIAn kalean dela Imanol Murua Uriaren Ending ETA’s Armed Campaign ikerketa lana. Ez da haren Ekarri armak liburuaren itzulpena, lan berean oinarritutako narrazio akademikoagoa baizik. 2010ean Loiolako hegiak aurkeztu zuen, iaz Ekarri armak. Gatazkaren (ondorioen) akaberaz trilogia osatzeko beste alerik?

Eugenio Ibarzabal. Argitaratzeko prest du bere liburu autobiografikoa Eugenio Ibarzabalek. Ikusiko dugu zenbateraino esaten dituen gauzak. Badu zer kontatua; esaterako, 1985-1987an Jaurlaritzako Presidentetza idazkari eta bozeramaile izan zen, lehendakari Jose Antonio Ardanza zela. GALen garaiak ziren, eta 1987tik, laster bezala, EAJ-PSE gobernu koalizioaren hasiera. Iazko maiatzean Ibarzabalen elkarrizketa atera genuen, haren beste liburu bat zela medio.♦

Detaileak

2016-11-15 /

Joan den aste hasieran erakutsi zidan adiskide batek beheko diploma hau. Maria Jesus Ezkurra Erize, Basaburuko (Nafarroa) bizilagunari herrialdeko diputazioak 1958an emandakoa da, euskara jakiteagatik, haren “gurasoei euskeraren iraupenerako lanetaz esker ona erakutsiz”. 200 pezeta eman zizkioten Maria Jesusi –honek dio gaur egungo 1.000 euro bezala zirela garaian–. Diru laguntza jasotzeko, Iruñera joan zen azterketa bat egitera. Euskera-Bizkormen saileko buruak sinatu zuen diploma. Francoren diktaduraren ‘detaile’ bat. Mende erdi bat pasara, Francoren diktaduraren ondorengo sisteman, kasurako berriki jakin dugu Nafarroan euskaraz ateratako lanpostuak atzera bota dituela Justiziak. Estatuak detaileraino sartzen jarraitzen du “ludiko itzkun zarrenetakoarekin”.♦ 

basaburua

Borondateaz

2016-11-12 /

BERRIAko analisiaren (2016-11-12) laburpena: EAJk joan den otsailaren 13an eta 14an egin zuen VII. Batzar Nagusia, Iruñean. Han ebatzitako txostena ez zuen zabaldu hilabete pasatu arte, eta ez da askorik aipatu. “EAJren doktrina bere txosten politikoetan jasota dago”, dio. Espainiaren “ukapena” aipatzen du, eta “ezinbestekoa da Euskal Herria subjektu politikoan eta erabakitzeko duen eskubidean sinisten duten indar politikoek estrategia bat partekatzea zoru etiko-demokratiko batean, gutxieneko helburu batzuetan eta prozesuen erritmoetan oinarrituta”. Gaur-gaurkoz, EAJn “XXI. mendeko independentista” eta “subiranista pragmatiko” sentitzen denak uste du oraindik ere Espainiarekin “burujabetza partekatua” lor daitekeela, eta nahi du Espainia horretan bizi. Norako bidea hartuko duen? Esaten da borondate ahulek diskurtsoetan dutela tokia, eta borondate indartsuek, ekintzetan. EAJk badaki —konfrontazioa bilatzeke— saiatuta ere bere “doktrina” fruiturik gabe geratzen bada zerekin geratuko den: dagoenarekin, eta duenarekin. Lasai, beraz.♦

2019a

2016-11-09 /

“Jaun-andere parlamentariak, Ipar Euskal Herriko hautetsiak, partidu politikoetako arduradunak. Denbora tarte mugatua duzue”. Hala ohartarazi zien Foro Sozialak urriaren 22an haiei Aieten, gatazkaren ondorioei buruz. Data zehatza aipatu zuen segidan: 2019a. Esanez abiatu dela EAEko legealdia, 2017 hasieratik martxan izango dela Iparraldeko Euskal Elkargoa, eta 2019ko udaberrian desegingo dela Nafarroako Parlamentua, (Hegoaldeko udal eta) foru bozen atarian. “Denbora tarte mugatua duzue”. Gure Esku Dago-k ere 2019a du buruan: ordu arteko bide orria aurkeztuko du datorren abenduaren 17an. Herri galdeketaren aldeko etxeko lanak 2017an eta 2018an egin behar, nagusiki. Rufi Etxeberriak ere bi urte horiek aipatu zituen duela hiru aste BERRIAko elkarrizketan: “2017a eta 2018a ezker abertzalearentzat oso garrantzitsuak izango dira. Batetik, prozesu subiranista indartzeko. Eta, bestetik, hura indartzen ari den neurrian gatazkaren ondorioetan ere urratsak egiteko”.

Foro Sozialak Aieten eragile politiko-instituzionalei esandakoak Gure Esku Dago-k ere esan ditzake lasai asko: “Erantzukizun politikoz jardutea eskatzen dizuegu, batzen zaituztena banatzen zaituztenaren gainetik jarriz. Gizarte zibil antolatuak babesa ziurtatzen dizue bide bateratzaile eta behin betikoa abian jartzea erabakiz gero”.

Gizarte zibil ‘antolatua’-n dago aldi honetako balio erantsia.♦

« Older posts Newer posts »

© 2024 Lerro batzuk

Theme by Anders Noren — Up ↑