Kaleragunea. Larunbatean ireki zuten Kaleragunea, Usurbilen, eta urtarrilaren 8ra arte han egongo da euskal preso ohien ordezkaritza bat, txandaka. 30-35 ohatze daude, eta, txanda mota desberdinen bidez, lortu dute gaueko egonaldi denak ere betetzea. Ez da datu makala. Atzo eguerdian Kaleragunean zeuden preso ohi asko adin batekoak ziren; aspaldi hasi zuten borrokari amaiera duina eman nahi diote, ja hasita.

Legelariak. Berrehun legelari baino gehiagok kartzela politika “bidegabea” bukatzeko exijitu dute, urtarrilaren 14ko manifestazioan parte hartzeko dei egiteaz gain. Pauso gehiago emango dituzte juristek. “Konfrontazio juridikoa” eskatzen dute esparruko ahots esanguratsu batzuek.

Katalunia. Katalunian badatoz epaiketa eta inhabilitazio politikoak, badatoz deskonexio legeak… Talka bi subjektu politikoren artean. Eta Kataluniaren aldeko ezer egituratu gabe dago Euskal Herrian.

Euskal Herria. EAEko kanpainako esaldirik sakonena Maddalen Iriartek bota zuen: Espainia nolatan hartzen den erreferentzia modura. Iñaki Dorronsorok, berriz, joan den astean BERRIAn: “Eusko Ikaskuntzak mundua Euskal Herritik begiratzen du, ez Espainiatik edo Frantziatik”. Horixe, Euskal Herria aintzat hartzen dutenentzat, 2017rako ariketa nagusia.♦

Gure Esku Dago. Iruñean, Baluarte jauregian aurkeztuko du Gure Esku Dago-k gaur hamabost 2019ra arteko bide orria. Nafarroan indartu nahi du erabakitzeko eskubidearen aldeko mugimendua, eta datozen egunetan herrialdean mintegi bat ere egitekoa da.

‘Kalera, kalera’. Abenduaren 10etik urtarrilaren 8ra izango da Kalera, kalera dinamika, euskal presoen eskubideen alde. 25 metroko karpa bat paratuko dute Usurbilen, eta egitaraua, mardula dator. Webean Kalera, kalera abesti ezagunaren bi bertsio jarri dituzte: Imanol Urbieta zenarena eta Fermin Muguruzarena. Euskal memoria kolektiboko kanta da. Asmatu dute izenarekin.

Inaxio Uria. Gaur 8 urte hil zuen ETAk Inaxio Uria Azpeitian, Loiolan. Atentatuaren tokitik Arrupe hotela ikusten da. 300en bat metrora dago, ibaiaren bestaldean. Arrupen bildu ziren, 2006ko udazkenean, EAJ, Batasuna eta PSE.

Nafarroako Ahal Dugu. Altsasun ospatuko du gaur Nafarroaren Eguna herrialdeko Ahal Dugu-k. Oportunista izatea egotzi dakioke. Baina Ainhoa Aznarez (Ahal Dugu) Nafarroako Parlamentuko presidenteak azken hilabetean egindakoa ere hor dago: Foro Sozialaren jardunaldia parlamentuan egin zedin erabaki zuen, tinko jarrita; eta atzo Altsasuko auziko gazteen gurasoak hartu zituen legebiltzarrak.♦

Gaindegia. Nazio planik gabe euskal geografiak hiritartze handi bat nozitu duela jota, Gaindegiak eredu piloto bat garatu du. Bihar aurkeztuko du, Gasteizen –Udalbiltzaren jardunaldi batzuetan–, euskal hiriburuetako auzoen iraunkortasuna neurtzeko paradigma berri bat.

Urkullu. Bihar egingo diote Iñigo Urkullu Jaurlaritzako lehendakari hautatu berriari lehen elkarrizketa: ETB2n, erdal telebistan.

Ziortza-Bolibar eta Altsasu. Ziortza-Bolibarretik Simon Bolivar Askatzailea-ren familiaren jauregitik 1982an Eusko Legebiltzarrera eramandako mahai batean sinatu zuten gaur zortzi EAJk eta PSEk EAEko gobernu ituna. Asteburuan jakin dugu Ziortza-Bolibarreko beste berri bat: han ere egingo dute 2017an galdeketa Euskal Herriaren estatusaz. Altsasu ere notizia da. Txio batean jarritakoa berriro: “Funtsean, Alde hemendik-etik Goazen hemendik-era pasatu behar delakoan. Bigarrenik ezean, aurrena, ezinezkoa”. 2017an Altsasun ere egingo dute euskal estatusaz galdeketa.

“Herritar batasuna”. “Herritar batasunaren sorrera agiria” zabaldu dute, baina idatzi hori oraindik ez da behin betikoa. Udalerrietan batzarrak egiten hasiko dira, eta ondoren osatuko dute azken txostena. Eta, gero, aurkezpen publikoa.♦