Kategoria: Gauza txiki batzuk (Page 2 of 3)

EAJ. EAJren EBBk gaurko bileran ez du hizpide izan presoen eskubideen aldeko larunbateko manifestazioa. Ez da joango alderdia. Ez da harritzekoa. 1999an izan zen; Lizarra-Garazi garaia zen. 2014an izan zen; Tantaz Tantaren martxa debekatu berri zen Espainiako Auzitegi Nazionala, eta EAJ izan zen deitzaileetakoa. Orain ez dago akordiorik eta EAJ ez da deitzailea = EBBk ez du deialdia tratatu. Horrek ez du esan nahi gaia Sabin Etxean ez dagoenik. Badago.

‘Antton’. Kalera Kalera-koek harreman asko egin dituzte azken asteetan, eta ari dira konplizitate berri batzuk erdiesten, lehen ezinezko zirenak. EBBrekin batu ziren, adibidez, Sabin Etxean; han zen Antton Lopez Ruiz Kubati. Hari harrezkero jeltzaleen arduradun batek esan dio hemendik aurrera Antton deituko diola, ez Kubati.

Egibar. Joseba Leizaolaren heriotza dela-eta Joseba Egibar EAJren GBBko presidenteak iritzi artikulu bat egin du. GBBren webgunean atariaren erdal bertsioan euskaraz dago, artikulua hala baino ez baitago idatzia. DVk berak Politika sailean euskaraz atera (behar izan) du. Gauza ttikia da, baina euskaldunak bidea marka dezake hedabideetan ere.

EITBko albistegiak. EITBko albistegiak: LABen diagnostiko orokorra eta proposamenak aurkezteko prentsaurrekoa deitu zuen EITBko LABek, eta hedabiderik ez zen azaldu… BERRIAk badakar artikulu bat idatziaz: “ETB1eko albistegietarako agenda eta arduradun propioak nahi ditu LABek”. Ematen du zer pentsatua txostenak. Esaterako, hau dio:

Espainiako erregea. Hego Euskal Herrian berriro jaitsi egin da Espainiako erregearen Gabon gaueko monologoaren telebista jarraipena, minimo historikoetaraino jaitsi ere. Dena den, politikari abertzaleak Eguberri egunez halako lehorkeri bati buruz lehen baino gehiago edo toki gehiagotan mintzatzen dira, Twitter ere baliatuz. Deskonexio mental ezaz ere txosten bat egin beharko da.

Sortu. Sorturen Zohardia txostenak 751 zuzenketa partzial jaso ditu. Gehienak, euskaraz idatzitakoak dira. Euskaraz bizitzeko borondatearen isla. Euskaratik ta euskaraz, 2017ko desafioa, euskaldun kontzientzia zeozer berpizten hasteko.♦

Harrera. Gaurko egoerari eta datorrenari ahal den ondoen aurre egiteko bazkide gehiago izan nahi ditu Harrera elkarte asistentzialak. Orain dela bost urte, ETAk jarduera armatua bukatutzat eman zuenean, EPPK-n 703 kide zeuden. Gaur egun, erdiak: 354 –Etxeraten azaro bukaerako datua da–. Kolektibotik kanpo beste dozena bat preso daude. Urteotan izan du lanik Harrerak preso eta iheslari ohiei “gizarteratzen” laguntzen. Lana ugaritzen ari zaio, eta, Espainiako auzitegiengatik, beharrak handitzen ere bai, epaileek preso ohiei langabezia saria ukatzeagatik. Duela urte erdi bat, 2.800 bazkide zituen.

Gure Esku Dago (I). Gure Esku Dago-k esaten duenean 2019ra arteko bide orria aurkeztuko duela, zer da, 2019 hasi artekoa? 2019 bukatu artekoa? Batik bat, 2019ko hauteskunde ziklo artekoaz ari da; hau da, Hego Euskal Herriko 2019ko maiatzeko udal eta foru hauteskundeak artekoaz.

Gure Esku Dago (II). Datorren larunbatean Euskal Herrian –Iruñean–, eta handik hiru egunera, asteartearekin, Katalunian aurkeztuko du bide orria Gure Esku Dago-k: Bartzelonan, Euskal Etxean. Angel Oiarbide mintzatuko da.

Orreaga taldea. “Nazio estrategiaz” hiru eguneko jardunaldiak egin ditu Orreaga taldeak Donostian, Kultur Mitxelenan, UEUrekin elkarlanean. Aretoa, bete antzean; ehunen bat lagun. Adin mota desberdineko jendea. Badute publiko bat.♦

Kaleragunea. Larunbatean ireki zuten Kaleragunea, Usurbilen, eta urtarrilaren 8ra arte han egongo da euskal preso ohien ordezkaritza bat, txandaka. 30-35 ohatze daude, eta, txanda mota desberdinen bidez, lortu dute gaueko egonaldi denak ere betetzea. Ez da datu makala. Atzo eguerdian Kaleragunean zeuden preso ohi asko adin batekoak ziren; aspaldi hasi zuten borrokari amaiera duina eman nahi diote, ja hasita.

Legelariak. Berrehun legelari baino gehiagok kartzela politika “bidegabea” bukatzeko exijitu dute, urtarrilaren 14ko manifestazioan parte hartzeko dei egiteaz gain. Pauso gehiago emango dituzte juristek. “Konfrontazio juridikoa” eskatzen dute esparruko ahots esanguratsu batzuek.

Katalunia. Katalunian badatoz epaiketa eta inhabilitazio politikoak, badatoz deskonexio legeak… Talka bi subjektu politikoren artean. Eta Kataluniaren aldeko ezer egituratu gabe dago Euskal Herrian.

Euskal Herria. EAEko kanpainako esaldirik sakonena Maddalen Iriartek bota zuen: Espainia nolatan hartzen den erreferentzia modura. Iñaki Dorronsorok, berriz, joan den astean BERRIAn: “Eusko Ikaskuntzak mundua Euskal Herritik begiratzen du, ez Espainiatik edo Frantziatik”. Horixe, Euskal Herria aintzat hartzen dutenentzat, 2017rako ariketa nagusia.♦

Gure Esku Dago. Iruñean, Baluarte jauregian aurkeztuko du Gure Esku Dago-k gaur hamabost 2019ra arteko bide orria. Nafarroan indartu nahi du erabakitzeko eskubidearen aldeko mugimendua, eta datozen egunetan herrialdean mintegi bat ere egitekoa da.

‘Kalera, kalera’. Abenduaren 10etik urtarrilaren 8ra izango da Kalera, kalera dinamika, euskal presoen eskubideen alde. 25 metroko karpa bat paratuko dute Usurbilen, eta egitaraua, mardula dator. Webean Kalera, kalera abesti ezagunaren bi bertsio jarri dituzte: Imanol Urbieta zenarena eta Fermin Muguruzarena. Euskal memoria kolektiboko kanta da. Asmatu dute izenarekin.

Inaxio Uria. Gaur 8 urte hil zuen ETAk Inaxio Uria Azpeitian, Loiolan. Atentatuaren tokitik Arrupe hotela ikusten da. 300en bat metrora dago, ibaiaren bestaldean. Arrupen bildu ziren, 2006ko udazkenean, EAJ, Batasuna eta PSE.

Nafarroako Ahal Dugu. Altsasun ospatuko du gaur Nafarroaren Eguna herrialdeko Ahal Dugu-k. Oportunista izatea egotzi dakioke. Baina Ainhoa Aznarez (Ahal Dugu) Nafarroako Parlamentuko presidenteak azken hilabetean egindakoa ere hor dago: Foro Sozialaren jardunaldia parlamentuan egin zedin erabaki zuen, tinko jarrita; eta atzo Altsasuko auziko gazteen gurasoak hartu zituen legebiltzarrak.♦

Gaindegia. Nazio planik gabe euskal geografiak hiritartze handi bat nozitu duela jota, Gaindegiak eredu piloto bat garatu du. Bihar aurkeztuko du, Gasteizen –Udalbiltzaren jardunaldi batzuetan–, euskal hiriburuetako auzoen iraunkortasuna neurtzeko paradigma berri bat.

Urkullu. Bihar egingo diote Iñigo Urkullu Jaurlaritzako lehendakari hautatu berriari lehen elkarrizketa: ETB2n, erdal telebistan.

Ziortza-Bolibar eta Altsasu. Ziortza-Bolibarretik Simon Bolivar Askatzailea-ren familiaren jauregitik 1982an Eusko Legebiltzarrera eramandako mahai batean sinatu zuten gaur zortzi EAJk eta PSEk EAEko gobernu ituna. Asteburuan jakin dugu Ziortza-Bolibarreko beste berri bat: han ere egingo dute 2017an galdeketa Euskal Herriaren estatusaz. Altsasu ere notizia da. Txio batean jarritakoa berriro: “Funtsean, Alde hemendik-etik Goazen hemendik-era pasatu behar delakoan. Bigarrenik ezean, aurrena, ezinezkoa”. 2017an Altsasun ere egingo dute euskal estatusaz galdeketa.

“Herritar batasuna”. “Herritar batasunaren sorrera agiria” zabaldu dute, baina idatzi hori oraindik ez da behin betikoa. Udalerrietan batzarrak egiten hasiko dira, eta ondoren osatuko dute azken txostena. Eta, gero, aurkezpen publikoa.♦

Gobernuaren kohesioa. Ikusi egin behar zer-nolako kohesioa lortzen duen Jaurlaritza berriak, bertan bi alderdi izanda. Hasteko, arraro samarra egiten da sail batean Enplegua egotea (EAJ) eta beste batean Lana (PSE-EE).

Jonan Fernandez. EAJ-PSE gobernu itunean Elkarbitza eta Giza eskubideak atalean konpromisoetako lehen puntuan ETAren “indarkeriaren amaiera ordenatua” ageri da. PSEk hauteskunde programan ez zeukan halakorik, EAJk bai. EBBk lortu du esaldi (kontzeptu) hori txertatzea akordioan, eta ematen dio garrantziarik. Jonan Fernandez atzo eta gaur inbestidura saioan izan da.

Otegi. Atzo arratsaldean Joseba Egibar (EAJ) bere lehen hitzaldia –ordu erdikoa– hastera zihoala, harmailetatik alde egin zuen Arnaldo Otegik. Bukatu zuen Egibarrek, eta Otegi orduantxe sartu zen berriro. Zergatia? Financial Times-ekin elkarrizketa egitera atera zen Otegi. Le Monde-rekin ere egin zuen atzo.

Senper. “Abstentzioa”, esan du Borja Senperrek bozketan. “Abstención“, PPko beste kideek –Laura Garridok nola esan duen ez dut entzun–. Duela urtebete Senperrek BERRIAko kazetari bati esan zion euskara ikasten ari zela, eta ea hurrena euskaraz egiten zuten elkarrizketa. Etxean egin dezake mintza praktikarik. 

EH Bildu. Maddalen Iriartek inbestidurako bere hitzaldian %85 inguru euskaraz egin zuen. EH Bilduk diskurtsoaren kopia banatu zien kazetariei, eta lehen orrian goian ageri da, koalizioaren ikurraren ondoan: Bai Euskarari. Zerbitzua euskaraz. Egibarrek ere ia dena euskaraz egin zuen.♦