Maiatzean egindako hiru greba egunen «arrakastaren» ostean, Arabako metalgintzako sindikatuek beste lau deialdi antolatu dituzte. Oraingoan, ekainaren 30ean eta irailaren 21ean, 22an eta 23an egingo dituzte lanuzteak. Horien helburua da SEA patronalarekin egin nahi dituzten negoziazioak desblokeatzea. Lau urte daramatzate sindikatuek lan hitzarmena berritzeko lanetan; ordea, diotenez, patronalak «bere horretan» dihardu.
Sindikatuek eskatu dute ekainaren 29rako aurreikusitako bilkura baino lehen beste bat egitea. Patronalari exijitzen diote soldatari dagokionez «benetako proposamenak» egiteko, KPIaren araberako igoerak eta subrogazio zabala bermatzeko, urteko lanaldia murrizteko, eta malgutasuna mugatzeko.
Bizkaian ere, kalera
Bizkaiko metalgintzako sindikatuek ere grebara deitu dituzte langileak, ekainaren 23rako eta 30erako eta uztailaren 1erako. Bertan ere «bloketatuta» daude negoziazioak –iaz arte egon zen indarrean duela hiru urte adostutako hitzarmena–. Sindikatuek «grebara joateko» ordua dela iritzi diote.
