Aurrera jarraitzen du AEBetako presidente Donald Trumpen eta Twitterren arteko norgehiagokak. Oraingoan enpresak estatuburuaren txio bat ezabatu du, "indarkeria goratzen" duelakoan. Minneapolisko protestei egiten zien erreferentzia txioak, han hirugarren gauez jarraian istiluak izan dira Geoge Floyd 46 urteko afro-amerikarraren hilketa dela eta. Trumpek txioan hala idatzi du: "Harrapatzeak hasten direnean, tiroketak hasten dira".
Zenbaiten arabera, Walter Headley 1967an Miamiko poliziaburu zenari egiten zion erreferentzia idatziak. Hark ere hitz horiek berak erabili zituen poliziaren jarreraren aurkako protestak geldiarazteko agindu zuenean. Poliziak kalean edonor gelditu eta miatzeko eskumena zuen orduan AEBetako hirietan, eta horren aurkako manifestazio jendetsuak egin zituzten herrialde osoan.
Txioa ezabatu eta bi ordura, Twitterrek berak ohar bat plazaratu du esanez txioak «indarkeria bultzatzen» duen arren, hura mantentzea erabaki duela «publikoaren intereserako».
....These THUGS are dishonoring the memory of George Floyd, and I won’t let that happen. Just spoke to Governor Tim Walz and told him that the Military is with him all the way. Any difficulty and we will assume control but, when the looting starts, the shooting starts. Thank you!
— Donald J. Trump (@realDonaldTrump) May 29, 2020
Aurrez ere estatuburuaren eta enpresaren arteko harremana ez zen on. Aste hasieran enpresak zalantzan jarri zuen Trumpen txio baten egiazkotasuna, eta estatuburuak erantzun zuen sare sozialek erabiltzaileen mezuak kudeatzeko duten askatasuna ikertzeko eskatuz.
